يا ظريف الطول

كلمات اغنية يا زريف الطول

يا زريف الطول وقف تقلك

رايح عالغربة وبلادك احسنلك

خايف يا زريف تروح وتتملك

وتعاشر الغير وتنساني انا

يا زريف الطول يا سن الضحوك

يلي رابي في دلال امك وابوك

يا زريف الطول يوم الي غربوك

شعر راسي شاب والظهر انحنا

يا زريف الطول متغرب على القوم

لا تبعد عنا وتحط علينا اللوم

انشالله بترجع بترجع عالكروم

نحصد القمحات ونجمع شملنا

يا زريف الطول غايب عن الاوطان

وغيابك عنا ملا القلب احزان

ارجع لامك وارجع للحنان

ما تلقى الحنية غير في بلادنا

يا زريف الطول حلو يا دلوع

والي يطيح البير يحسب للطلوع

احنا اتفرقنا وعالله الرجوع

والمفرق والمجمع ربنا

يا زريف الطول مالي ومالكم

وابتليته بالهوى وش حالكم

وان كان عشرت غيرنا طابت ليكم

خبرونا تندبر حالنا

يا زريف الطول وقف تقلك

رايح عالغربة وبلادك احسنلك

خايف يا زريف تروح وتتملك

وتعاشر الغير وتنساني انا

قصة  "ظريف الطول"

زريف الطول كان نجار وغريب عن القريه..

كان اسمه فلسطيني ولكن طوله كان سبب اسمه

كان خلوق ما يرفع عينه في امرأه وكان أبو حسن يعطه أجره كل أسبوع ولم يكن يعلم ما يفعل به..

بنات القريه بغزلوا حواليه وهو ولا هوه هون ..

مرت المختار فصلت نمليه مشان تلفت نظره لبنتها...

وام خليل مرت خطيب القريه فصلت عندو صندوق (اواعي) وحكتلو عن بنتها.. حتى الخطيب .. في خطبة الجمعه لمح للموضوع بس ما في فايده...

زريف الطول مش تبع نسوان.....

في يوم هجموا قطعان اليهود على القريه واستشهد 3 شباب ...

ثاني يوم غاب زريف الطول ورجع بعد 4 ايام ..

رجع بالليل ما حدا شافوا ...

بعد شهر رجعت قطعان اليهود ...

كان زريف الطول مشتري 5 بواريد وزعهن على شجعان القريه ..

قتلوا 6 يهود ...

ثاني يوم القريه قامت وقعدت..

النسوان باعن ذهبن مشان الشباب تشتري بواريد ..

وصاروا يغنوا..

يا عربي يا ابن المقروده بيع أمك واشتري باروده ..

رجعت القطعان توخذ بالثأر وحصلت معركه مثلها ماصار..

هرعوا الناس كبار صغار وفي كروم التفاح ريح الثوره نسّم وفاح...

استشهد شباب كثير بس خسائر القطعان أكثر ...

جمعوا الشهداء وزريف الطول مش معهم ..

وزريف الطول مش مع اللي بقوا ...

بس الكل حلف يمين انو شاف زريف الطول قتل أكثر من 20 يهودي ..

وكان يطخ ببارودتين وهو اللي سحب عمار وجهاد أولاد الأرملة من ساحة المعركه وهم جرحى والرصاص زي زخ المطر فوق رأسه ...

طول الليل القريه دورت بالمشاعل على زريف الطول ..

مابين الو أثر ...

ومرت الأيام وصار زريف الطول اغنية القريه ...

يا زريف الطول وين رايح تروح بقلب بلادنا تعبقت الجروح

يا زريف الطول وقف تاقولك رايح عالغربه وفلسطين احسنلك..

بعدها بخمس سنين إبراهيم الحلاق حلف يمين انو شاف زريف الطول مع عز الدين القسام في احراش يعبد..

وجهاد ابن الأرملة بقول شافو مع الحنيطي بدرب الثوار بيافا..

اكيد مهو مش غشيم عنو ...

وكثير ناس حلفت انو كان ببورسعيد مع جول جمال ..

وعلى الوصف ناس شافوه بالكرامه على نهر الأردن بفجر دبابة بعد ما قطعت النهر ...

وكان بسوق الغرب في اجتياح بيروت ...

بس آخر مره شافوه..

كان بغزه..

طلع للقطعان من نفق رمى صلية صواريخ على تل أبيب ورجع على الخندق ....

زريف الطول كل مقاوم ..

وكل ايد قابضه على السلاح وسبابتها على الزناد ...

قال الناشط في الحفاظ على التراث الفلسطيني، محمد أبوليلى، لـ"العربي الجديد": تناقل الأجداد هذه الأغنية منذ أيام الانتداب البريطاني في فلسطين، ويروي الأجداد قصّة "ظريف الطول" مؤكدين أنه شاب فلسطيني كان يحمل اسماً فلسطينياً لكن طوله كان سبباً بأن يطلق عليه اسم "ظريف الطول". حيث اعتبرت اغنية "ظريف الطول" من الأغاني الشعبيّة الأساسيّة حيث تُردّد دائما في المناسبات الاجتماعيّة والوطنيّة منذ عقود عدّة، ورغم مرور السّنين، إلا أن معظم من يتناقل هذه الأغنية لا يعرف من هو "ظريف الطول".